كلمات اغنية الذوق الفريد خالد ال بريك

الذوق الفريد خالد ال بريك كلمات

ليل طويل ويسمع الرجال نبضه في الوريد

والنور مرخي حاجبه والليل رافع منكبه

متاهة العشاق بين الشك والعلم الأكيد

لا ناموا العالم وجاء للشوق مثل الذبذبة

ما كل ليل يتبعه لمسامرينه صبح عيد

وما كل ذكرى تعتريهم للنفوس محببة

بيني وبينه من زمان قد مضى حبل جويد

هاك السنة وقت التنافس والفجوج معنكبه

على القريحة والقريحة في اللزوم امجربه

وعن زلة ماهيب مقصودة وكلمة ماتفيد

إعصم لساني واحفظه بأمرك وبالحق أدبه

ياليت للقلب اتزان وليت للاحساس قيد

من زاد معيار اهتمامه في أي شخص يخربه

والنعم غيداء فارقة عن كل عرب وكل غيد

ماترتضي في خطبة الرجال لين تعذبه

دبر وسو الي تبي والله يدبر ما يريد

الرزق قبل الله يخلق الارض والناس اكتبه

والوقت له دورة وعمر الرجل لو انه مديد

دايم هلال آخر شهر هجري يجي فيه حدبه

لن مانفع هالحين بكرة وش يفيده منصبه

وانا ما اغبط المعتصم بالله وهارون الرشيد

اليا سهجت الجيب من ملهم يالين الدبدبة

قطعة عقيق اسود تحرك فوقها قطعة جليد

على يدين مدرب المهر الأصيل مدربه

بين الغمارة والغمارة يشتغل ساعي بريد

لا جيت أوصل غترتي من مرتبة لا مرتبة

يا قل عرف اللي يقول انه حديد في حديد

لا بالله الا معدنه نادر بـ لوله واذهبه

واليا سليت برفقته يومين مرتاح ووحيد

عودت باللي مالها مع ساير الارياء شبه

بكار وضح من تلاد نياق بادي بن وديد

الشايب اللي عزها وقت السنين المجدبة

في كل عرض مجهزة وملبسه ثوب جديد

موفقة ومحصنة ومنسقة ومرتبة

قالوا صناديق السلاح يشيلها مثل الجريد

والله عطاها الزين كله بين وسرة ورقبة

ويالشاعر اللي كل ما زادوا هل الجزلة تزيد

ان كان عندك شعر يمنعني عن المنبر جبه

اكرب حزامك والقريحة قدمك تطق اللبيد

على ذلول من تواريخ الجدود مزهبه

كله عشان المحفل اللي سقفه الذوق الفريد

ومعزب ما كل شعار الجزيرة تعجبه

فيصل عضيد اللي يدور له من الدنيا عضيد

الله يرحم وجه من عقب جميل وعقبه

والله يافيصل بن رشيد ان فيك واجد من رشيد

اما رشيد النظم ولا من رشيد الملعبة

ولا رشيد اللي جميله مع قريب ومع بعيد

كم شاعر موجود في القلطة يغني بسببه

ولا رشيد اللي يفل الراي بالراي السديد

ما يقدم الا والجنابي والسيوف مذهبة

إمبعده عقله عن الزلات والهرج الزهيد

والله مع اصحاب الجلالة والفضيلة قربه

اليا وصلته مرهقك موضوع ودك تستفيد

كنك وصلت مجلدات الكتب بأكبر مكتبة

من يجمع الضدين كف ذرب وذراع شديد

ما تقدر صدوف الزمان اتشرقه واتغربه

الشيخة المتوارثة فالشيخ من ماض تليد

عند القبايل والحمايل زاكية ومطيبة

ماهو فقيد النظم والطاروق لا بالله فقيد

كل المراجل والشهامة والعلوم الطيبة

والعود ما قصر عساه بخير في يوم الوعيد

عز الله انه سمع في عرب ولدك وعربه

فيصل على العليا مقره لا يحيد ولا يميد

حتى لو الدنيا على العاقل ماهيب مشببة

هذا زلامي ليا من قال كلمة ما يعيد

عالي بقدره بين خلق الله وعالي بـ لقبه

الله على ماقلت يا فيصل على المنبر شهيد

يصلح عليك إنا نقول ان اصدق الشعر أعذبه

بعض القصايد ترفع الممدوح وتزيده رصيد

إلا انت ترفع من يغني فيك قدر ومرتبة