كلمات اغنية ياموصي لا توصي شبل الدواسر

ياموصي لا توصي شبل الدواسر كلمات

البَحَر والشّعْر تربطهـم مواثيـق و زمالـة

من يردّ الموج والشاعر ليا هبّـت هبوبـه

يا بَحَر لوّ أكتب أبياتي على موجك رسالـة

بيت واحد من بيوتي يقلب أملاحك عذوبـة

يا بَحَر يا ليتني باقي على طيـش الجهالـة

يوم كنت صْغِير ما اواجه من الدنيا صعوبـة

الفرح عنـده موظّفنـي ومعطينـي وكالـة

للضحوك وللمزوح ونزوة النفـس اللعوبـة

الفرح عيّا اسلوبي لا يوافق مـع اسلوبـه

القوانيـن القديمـة والمذاهـب والأصالـة

تلزم الرجّال لوّ الحـال ماشـي دوب دوبـه

يا بَحَر والله ما شيّب روسنا غير الرّجالـة

عيب نسكت وإن هَرَجْنا كلمة الرّجل مْحَسوبة

يا موصّي . لا توصّي صاحْبِك يلـزم ريالـه

وش يسوّي بالفلوس اللي تبرّت من جيوبـه

أنت وصّلْت النصيحة واتركه مالـك ومالـه

الكرم ماهو مجنَّب عنـه لـو إنّـه عقوبـة

كمّ مرّة جاه حملٍ مـا يطيقـه وارتكـى لـه

من عناده للحمول الجايرة مـا قـال توبـة

مع صلاة الظهر في جدّة وفي عزّ الرطوبـة

لجل ما يدرون ضيفانه بحالـه كيـف حالـه

مايجيهم غير مستانس ويضحك مع جنوبـه

كرّم الله لحية اللـي ضيفـه يكـرّم سبالـه

وسوّد الله لحية اللي يعطي ضيوفه ذروبـه

البخيل تشوف وسم الضّيم حتّى في عيالـه

ما تقول الاّ مشَلْوطهم على النـار الشّبوبـة

والكريم ليا عطى كنّه ما يعطي مـن حلالـه

لو طلبته ثوبه اللي لابسـه يعطيـك ثوبـه

نعنبوا جدّ البخـل واللـي يحطّـه رأسمالـه

البخيل بْخيل ما يعطيك حتّى مـن ذنوبـه .!