كلمات اغنية بنحب من بلدنا محمد وردى

بنحب من بلدنا محمد وردى كلمات

بنحب من بلدنا ما برّه البلد

سودانيّة تهوَى عاشق ود بلد

في عيونها المفاتن شئ ما ليهُ حد

التّوب المهبهب فوق أم الضّفائر

والخد المعطّر زي أحلى الأزاهر

والخطوة الأنيقة ترنيمة مشاعر

أنا بيك كل عمري بمشيلها وبسافر

مين في الدّنيا ديَّ أجمل من بناتنا

الليهن قلوبنا والفيهن صفاتنا

الكامنات بروحنا والعايشات في ذاتنا

في حلفا البداية أحلامي وهنايَ

أنا عايش لحبّي المخضر برايَ

أنا ليْ في كريمي شايقيي بشلوخها

نعتز بي صفاتها ما نجهل تاريخها

وما ها المابية ريدتي مو ياها المسيخة

في شندي العظيمة تلقى بنات جعل

واحدات في المتمّة زي لون العسل

النايرات خدودِن زي فجراً أطلْ

في سنكات بنعشق في السّمراء وأبيّة

ترتاح في الضّريرة خُصلاتها الغنيّة

عاشت في شعورى أحلَى هدندويّة

الوارثات جدودن في الجّود والشّجاعة

البظهر جمالن من زمن الرّضاعة

سودانيّة ميّة الميّة في ذوقها وطباعها

ياناس أرحموني انا قلبي في رفاعة

لوزة القطن اليانعة السّمحة ونضيرة

تِتّنَّىَ الحليوة في مشية أميرة

أجمل حب عندي في قلب الجزيرة

ليْ في الغرب أغْيَدْ في دار حَمَر والبقّارة

تسكرنا الليالي وتطربنا النُقّارة

ليْ في جوبا ساحر تسلم ليْ خدودُه

يمرح في غاباتُه ويسرح في ورودُه

حبّي الغالي ليهُ ما بعرف حدودُه