كلمات اغنية قلت أرحل مصطفى سيد احمد

قلت أرحل مصطفى سيد احمد كلمات

قلت أرحل

قلت أرحل ..

أسوق خطواتي من زولاً نسى الإلفة

أهوِّم ليل

أساهر ليل

أتوه من مرفى لي مرفى

ابدل ريد بعد ريدك

عشان يمكن يكون أوفي

رحلت وجيت

في بعدك لقيت

كل الأرض منفى

عيونك زي سحاب الصيف تجافي بلاد وتسقي بلاد

وزي كلمات بتتأوّه.. تتوه لمن يجي الميعاد

وزي عيدا غشاني وفات عاد عمّ البلد أعياد

وزي فرح البعيد العاد

وزي وطناً وكت اشتاقلو برحل ليهو من غير زاد

بدون عينيك بصبح زول بدون ذكرى وبدون ميلاد

رحلت وجيت

في بعدك لقيت

كل الأرض منفى

زمان الفُرقة والتجريح بسِيبُو عشان تشيلو الريح

بسيبو عشان صحيح الذكرى بتّوِّه عمرنا صحيح

وانتِ معايا لا بندم ولا بقضي العمر تبريح

أصلو العمر شوقا ، حزنا كان وصبرا كان فسيح وفسيح

أصلو العمر كان دربا مشيتو كسيح

وكان غرسا سقيتو بكى وقبضت الريح

رحلت وجيت

في بعدك لقيت

كل الأرض منفى