كلمات اغنية مجرودة مهداه للنعامي الترباني انس ابو جليدان باسل الدباري

مجرودة مهداه للنعامي الترباني انس ابو جليدان كلمات

أول ما ابدأ قوافينا صلوا عالنبي هادينا..........

بدينا نظم الأبيات لنانسن غليين علينا

.

جبت انا القاف الموزون

مثل رشات المزون

للرفيق اللي مايهون

إلعينك تكرم اعيون

رفيقي عالراس والعين ..........

اسمع الهرج بمعاني.

إلعين عيون الترباني

للنعامي هالقيفاني

وحبله حبل ميتين

يامرحب حي النعامي

مرحبا بذيب الازلامي

رجال وعالي المقامي

مني مليون السلامي

لعيون الرجال الغانمين............

يلي انته تنشد علينا

تفرج ع فعل إيدينا

في الخارج ولا في سينا

دايم عالنخوة تلاقينا

إسباع عالجود اتربينا

مهما الدنيا تضيق علينا

ماسوينا الفعل الشين

لا ماتلحقنا يالبعيد

تلقانا عن الشينة نحيد

الله محيي الشيخ زويد

شهامة اوصيتن الزين............

فكر فالنعامي الحر

جسار ولحمه مر

رفقه رفق يسر

ياحليلك ياذيب البر

اينام امفتح العين

ابوبريك عبدالكريم

الحج الشهم الحكيم

كفه سخي وكريم

ودايم رايه سليم

ياما فك بين الخصمين..............

ياذيبن واذيابة اولاده

ماجابت زيهم ولادة

فالجود والكرم بزيادة

مني ليهم هالشهادة

اجواد وبحلف يمين

هذا أبوابراهيم جلال.

يانشمي ذيب الرجال

اللي للعقدة حلال

لمدحه ابزين الأقوال

ربعه للعز عناوين................

أما ابوبكر القرناس

أفعاله ترفع الراس

يقدم مايهاب الأنجاس

فالميدان عداعش داس

تشهدله الميادين

ميادين ودها الرجال

اقلوبهم صخر الجبال

يومنه أبوبكر قال

اقوال النعامي أفعال

عالعدا قلبه مايلين..............

وابومالك إبراهيم

الشيخ الكفو الفهيم

زعيم وبيظل زعيم

اولهم فاللوازيم

والعقل راكز فطين

ياحليله وقت النشايب

مثل فارس سيفه طايب

لن لحق سروج الركايب

مرحب عزوة القرايب

يومن الليالي تشين.............

اما خالد الجسار

كبير ومن ناس اكبار

لو الارض تولع نار

ابد مايرافق غدار

ولا يقبل الخاينين

وأسامة رجل الشيدايد

عوايده زين العوايد

دومن عليهم في زايد

نعامي عنه ما حايد

رفيق وما زيه اثنين...............

ومصطفى الشهم الاصيل

مثله واللهي قليل

شيال الحمل الثقيل

ياذيب من ذياب الليل

فالشدةْ أول الحاضرين

فالشدة انخا سلمان

يفزعلك فزعة شجعان

يقدم قدوم الطوفان

ولا فارد الجنحان

ماتعرفه من وين؟ لوين؟................

أما أحمد صقر القوم

يحليله يومنهي اتقوم

المعارك تلقاه دوووم

فارس قوي العزوم

رد الضربة ضاربتين

وهذا ابريك الخطير

بافعاله دومن كبير

وقفاته وقفات الزير

قعوده يهدر هدير

عدوه وحل فالطين.............

نعامي والفخر بيهم

فالقلب دوم اساميهم

إرجال ابننتخي فيهم

عالطيب والنخوة انلاقيهم

مثل الصقور الشياهين

ترباني طيبن عاطيب

ما يصعب عليه صعيب

والسبع يومنه إيغيب

بالجزلة يرجع ويجيب

ويجيب الصيد الثمين...............

نختمهي بذكر الرحمن

والصلاة على العدنان

شفيعنا من النيران

الدباري وابوجليدان

للنعامي أهدو بيتين